BAF 4-2

PLANONG ARALIN / GABAY SA KURSO (COURSE GUIDE)

FILI 401 Seminar sa Paghahanda sa Praktikum

3 yunit

Deskripsiyon ng Kurso

Ang kursong ito ay naglalayong ihanda ang mga mag-aaral ng AB Filipinolohiya sa kanilang pagsabak sa praktikum. Tatalakayin dito ang mga pangunahing kasanayan sa korespondensiya, etika sa lugar ng gawain, pagbuo ng mga dokumentong propesyonal, at paglinang ng kasanayan sa komunikasyon. Bahagi ng kurso ang simulation ng aktibidad-proyekto upang masubok ang kanilang kahandaan sa propesyonal na larangan.

Tinutugunan ng kursong ito na ihanda ang mga mag-aaral sa pagpasok sa mga aktwal na pagsasanay sa labas ng akademya. Layunin nitong gawing handa, may kumpiyansa, at maalam ang mga mag-aaral sa mga inaasahang gawain at responsibilidad bilang mga intern sa iba't ibang institusyon at industriya. Isinasagawa ito sa pamamagitan ng kombinasyon ng mga talakayan, workshop, case studies, role-playing, at iba pang interaktibong gawain.

Sa pamamagitan ng kursong ito, tatalakayin ang mga konseptong makakatulong sa pagpapalawak ng kaalaman ng mga mag-aaral tungkol sa paghahanda ng mga propesyonal na dokumento gaya ng paglikha ng mabisa at propesyonal na resume o curriculum vitae (CV), paggawa ng nakahandang liham aplikasyon, at pagsagot sa mga karaniwang tanong sa panayam.

Gayundin, tinutugunan nito ang mga etika at pag-uugaling propesyonal na nagpapakilala sa wastong asal sa trabaho, pag-unawa sa hirarkiya sa organisasyon, at pagresolba sa mga isyung maaaring lumitaw sa lugar ng trabaho habang pinapanatili ang integridad at pagiging etikal.

Kabilang rin dito ang pagsasagawa ng dokumentasyon at ulat upang mapaunlad ang kakayahan ng mga mag-aaral sa pagdodokumento ng kanilang mga gawain sa praktikum kabilang ang pagsulat ng daily log, case report, observation notes, reflective journal, at pinal na ulat.

Mga Bungang Pagkatuto

1. Nakapaglalahad ng malinaw, organisado, at mapanuring pagninilay gamit ang angkop na teorya o lapit na pangmetodolohiya hinggil sa kanilang paglalakbay sa AB Filipinolohiya bilang paghahanda sa praktikum 

2. Makabuo ng masinop, pormal, at epektibong dokumentong propesyonal (CV, cover letter, memo, ulat, liham) gamit ang Filipino alinsunod sa pamantayan ng masinop na pagsulat at pormal na korespondensiya. 

3. Nakapagsasagawa ng mahusay na pasalita at pasulat na komunikasyon sa konteksto ng pag-aaplay, panayam, korespondensiya, at pag-uulat sa lugar ng praktikum. 

4. Makapagpakita ng propesyonalismo, kahusayan, wastong asal, at kolaborasyon sa mga gawaing pampaaralan, kabilang ang malikhaing presentasyon o diskurso, bilang paghahanda sa aktuwal na praktikum. 

5. Makapagpakita ng etikal na pagpapasya at pag-uugali na may paggalang sa data privacy, confidentiality, workplace values, at gender sensitivity. 

6. Makapagsagawa ng masinop, makabuluhan, at etikal na case study sa isang gradweyt ng AB Filipinolohiya gamit ang angkop na metodo, panayam, at dokumentasyon, at makapagbuo ng malikhaing presentasyon ng resulta. 

7. Makabuo ng komprehensibo, organisado, malikhaing, at propesyonal na portfolio na nagpapakita ng kahandaan para sa praktikum.