BAF 2-1

Ang Mga Teorya sa Pag-aaral ng Wika ay isang kursong may tatlong yunit na nakatuon sa pagkilatis sa iba‘t ibang teorya hinggil sa pag-aaral ng wika mula sa lente ng mga iskolar. Pangunahing nakatuon ang kurso sa mga batayang teorya sa pag-aaral na wika na esensyal sa pagsusuri at pag-unawa sa katangian at mga kotexto ng wika sa lipunan. Mula sa perspektiba ng lingguwistika partikular sa mga pagsusuri ni Ferdinand De Saussure sa librong Course in General Linguistics, hanggang sa politikal na pagsusuri nina Pierre Bourdieu, Voloshinov, Chomsky, hanggang sa mga pag-aaral ng mga Pilipinong iskolar tulad nina Lumbera, Almario, Paz, at Salazar, kikilatisin ang mga batayang konsepto at teorya sa pag-aaral ng wika. Tinatangka sa kursong ito na hindi lamang maging pamilyar ang mga mag-aaral sa batayang teorya, kundi higit ay mailapat ito sa pagsusuri sa mga penomenong pangwika sa bansa.

Ang Diskurso ay isang kursong may tatlong yunit na nakatuon sa pagkilatis sa pangkalahatang konsepto ng kumbersasyon sa lahat ng modaliti at konteksto. Ang diskurso ang isa sa pinakamahalagang konsepto ng bmakabagong kaisipan sa malawak na disiplina ng humanidades at agham panlipunan. Sa ganitong punto, pangunahin nakatutok ang kursong ito sa kung paanong ang wika ay gumagana o nagagamit sa ating pakikipag-ugnayan sa bawat isa at sa daigdig, na lumilikha at humuhubog sa politikal at kultural na pagbalangkas sa ating lipunan (Hyland at Paltridge, 2011).

Sa kursong ito, hindi lamang itatrato ang wika bilang isang object o bagay na marapat pag-aralan sa lente ng lingguwistika, sa halip ay bubusisiin ang kontekstong nilulugaran nito sa mga penomenong umiiral sa lipunan tulad ng mga isyu ng uri, lahi, etnisidad, kasarian, at relasyong kapangyarihan. Inihahanda nito ang mga mag-aaral sa pagtatamo ng kritikal na paningin sa pamamagitan ng pagsusuri sa iba’t ibang texto, pasalita at pasulat, gamit ang mga lapit sa diskurso. Ang matatamong kaalaman at kasanayan ng mga mag-aaral ay makatutulong sa kanilang tinatahak na larang tungo sa paglikha ng mga pananaliksik sa Filipinolohiya